KFC-mótið 2008

Nokkrir strákar úr hópi væntanlegra Spánarfara gátu unnið sér inn aura á ferðareikninginn sinn á KFC-mótinu 3. maí. Í þetta sinn var mótið á Þróttarvellinum í Laugardal vegna þess að Víkingssvæðið er í uppnámi þar til langþráðri grasvallargerð lýkur. Mótið var Víkingum til sóma og enn frekar KFC, sem stendur svo myndarlega að sínum hlut að til eftirbreytni er. Glæsileg umgjörð, pottþétt skipulag, tímasetningar upp á mínútur frá morgni til kvölds og kjúlli með frönskum í lokin. Ekkert nema sæla. Þetta er einfaldlega flottasta mót sem um getur fyrir fótboltaungviðið og hana nú. Það má vel velta því fyrir sér hvort forysta félagsins okkar geri sér grein fyrir því hve umfangsmikill og mikilvægur stuðningur þessa styrktaraðila er félaginu og ímynd þess. Svona nokkuð er nefnilega langt frá því að vera sjálfsagður hlutur ár eftir ár. Og næsta víst er að það er ekkert KFC-mót án KFC!