Með eitt stig heim úr Egilshöll

Uppskeran í leikjum gærkvöldsins við Fjölni var eitt stig af sex mögulegum. A-liðin gerðu jafntefli, 1-1, en Fjölnir sigraði, 2-0, í B-leiknum.

Markalaust var í hálfleik A-liðanna en Fjölnismenn komust yfir í síðari hálfleik og Viktor jafnaði fyrir Víking. Gunnar Örn þjálfari segir að út af fyrir sig megi una við jafntefli í leiknum. Víkingar hafi fengið ágæt færi í fyrri hálfleik og Fjölnir í þeim síðari en hvorugu liðinu hafi tekist að nýta sér þau. Víkingar hafi svo getað gert út um leikinn á lokamínútunum en gerðu það ekki.

B-leikurinn var Víkingum mun mótdrægari. Gunnar Örn segir að Víkingsliðið hafi varla átt almennilegt færi í leiknum en hins vegar þurft að verjast Fjölnismönnum, sem skoruðu eitt mark í hvorum hálfleik. Reynt hafi því verulega á vörnina og að Halldór markvörður hafi verið í miklu stuði og varið meðal annars vítaspyrnu. 

Næstu mótherjar Víkings í Íslandsmótinu verða hinir hafnfirsku FH-ingar. Þeir koma í Fossvoginn á föstudaginn kemur, 18. júní, og mæta okkar mönnum í Víkinni.