Davíð Örn með fernu gegn Hafnfirðingum

Víkingar rúlluðu yfir FH í A-leik Íslandsmótsins í 3. flokki  í Víkinni í kvöld með sex mörkum gegn einu en töpuðu hins vegar fyrir gestum sínum úr Hafnarfirði í B-leiknum, 0-3.

Sanngjörn úrslit í báðum tilvikum og meira að segja hefðu úrslitin 9-0 í A-leiknum verið meira í samræmi við gang hans en 6-1, svo miklir voru yfirburðir  okkar manna.

Davíð Örn skoraði fjögur mörk í A-leiknum, tvö í hvorum hálfleik. Ferna í leik í Íslandsmóti er að sjálfsögðu stórt og mikið blóm í hnappasgatið!  Aron Elís skoraði eitt mark í síðari hálfleik og Ólafur Andri annað. Aron Elís kom líka við sögu í aðdraganda nokkurra af mörkum kvöldsins með óeigingjörnum leik og fínum sendingum á samherja sem skiluðu mörkum.

Víkingar spiluðu annars mjög vel sem lið og uppskáru í samræmi við það.  Hafnfirðingar áttu enga möguleika og þetta eina mark sem þeir skoruðu var í stöðunni 5-0 og Víkingar voru þá  komnir í ótímabæra slökun og innhverfa íhugun. 

FH-ingar unnu hins vegar verðskuldað í B-leiknum en það munaði ekki miklu að Víkingar kæmu einu marki á gestina, kannski tveimur. B-lið FH var reyndar að mörgu leyti skemmtilegra á velli en A-lið FH og sterkir leikmenn voru þar innan um, ekki síst framherjinn sem skoraði í tvígang og hafði mikið nef fyrir því hvar bolta væri að vænta í markteig Víkings.

Engar afsakanir af hálfu Víkings en það verður að segjast að við finnum fyrir því að nokkrir öflugir strákar eru frá spilamennsku vegna meiðsla eða veikinda!

• Myndir frá leikjum Víkings og FH18. júní 2010.