Selfyssingum enginn griður gefinn

Víkingar höfðu lítið fyrir sex stigum sem bættust í sarpinn í Víkinni í dag í viðureign við Selfyssinga.

A-liðið yfirspilaði andstæðinginn og gjörsigraði með níu mörkum gegn einu, í hálfleik var staðan 3-0. Davíð Örn skoraði þrennu, Ólafur Andri tvö, Robbi tvö og  Viktor og Agnar Darri eitt hvor. Selfyssingar náðu einni sókn í hvorum hálfleik og skoruðu úr þeirri síðari. Að öðru leyti segir markatalan það sem segja þarf. Víkingsliðið reis svo um munaði úr öskustónni eftir dapran dag gegn Þrótti fyrr í vikunni.

Leikur B-liða Víkings og Selfoss endaði 5-2, í hálfleik var staðan 3-0. Viktor, Sigurður Davíð, Jóhann G., Ási og Davíð Örn skoruðu Víkingsmörkin og Davíð varð þar með samtals fjögurra marka maður í dag. Meira jafnræði var með liðunum í síðari hálfleik en hinum fyrri og hvort lið skoraði þá í tvígang. Í B-liði Selfoss voru nokkrir voru áberandi sprækari og sókndjarfari strákar en A-liðsmennirnir þeirra í fyrri leiknum.

Í heildina tekið góður Víkingsdagur og ekki spillti fyrir að báðir leikirnir voru á aðalvellinum. Margir Víkingar voru að stíga fyrstu skrefin á þeim helga stað í fyrsta sinn í leik, sem að sjálfsögðu var upplifun. Það spillti svo auðvitað ekki fyrir að sigra örugglega í tilefni dagsins.