Fjölnisdagur í Víkinni

Fjölnir kom, sá og sigraði í þriðja og síðasta síðasta undanúrslitaleik Íslandsmótsins í 4. flokki. Skemmst er frá því að segja að Víkingar sáu aldrei til sólar í leiknum og hið eina sem gladdi Víkingsaugað í stúkunni var fallegt mark Arnars Sölva um miðjan síðari hálfleik. Fjölnir skoraði í tvígang í fyrri hálfleik og átti auk þess skot í stöng. Fjölnir hóf síðari hálfleik með því að bæta við þriðja markinu og fjórða Fjölnismarkið blasti við á eftir miðjan hálfleikinn þegar gestirnir splundruðu Víkingsvörninni enn einu sinni og fengu allan heimsins tíma til að afhafna sig framan við mark heimamanna. Úrslitin því 1-4 og Fjölnir var mun nær því að auka við forystu sína en Víkingur að saxa á forskot gestanna.

Um næstu helgi bíður B-liðs Víkings að keppa til úrslita í Íslandsmótinu og vonandi mæta strákarnir þá til leiks með öðru hugarfari en einkenndi A-liðið í leikjum þess nú um helgina. Satt að segja væri verðugt rannsóknarefni að finna hvað varð af kraftinum og baráttuandanum sem skein af A-liðinu á ReyCup í sumar!

Úrslitaleikir B-liðsins:

• Víkingur-KR: Víkin, föstudaginn 12. september kl. 17:00.
• Fjölnir-Víkingur: Fjölnisvöllur, laugardaginn 13. september kl. 14:00.
• Víkingur-Þór: Víkin, sunnudaginn 14. september kl. 14:00.