Gott gengi á jólamótinu - endurunnin frétt!

Víkingar stóðu sig umtalsvert betur á jólamóti Knattspyrnuráðs Reykjavíkur 29. desember en greint var frá hér á síðunni. Umsjónarmanni tókst að snúa við úrslitum í KR-leik B-liðsins og munar um minna ef fullyrt er að Víkingar hafi skíttapað fyrir KR 0-5 þegar staðreyndin er sú að Víkingar yfirspiluðu KR og unnu 5-0! Leiðrétting á þessu meira en réttlætir þá breytingu á fyrirsögn fréttarinnar að þokkalegt gengi verði gott gengi. Uppskera Víkings varð því eftirfarandi:

1. Sex leikjum af tólf lyktaði með Víkingssigri, þremur með jafntefli og þremur með tapi.
2. Víkingar skoruðu átján mörk en fengu á sig sjö.
3. A- og C-liðin sigruðu í tveimur leikjum og gerðu jafntefli í þriðja leiknum.
4. C-liðið skoraði sjö sinnum án þess að fá á sig mark en A-liðið skoraði þrjú mörk gegn engu.

Víkingar sendu fjögur lið til keppni í jólamótinu. Mannskapur var til í fleiri lið en aðeins fékkst leyfi til að skrá fjögur lið til keppni.  Víkingur annaðist mótsstjórn fyrri hluta dagsins, frá mótsbyrjun kl. 9:00 til 14:30, lagði til dómara og skrá úrslit.

Engir úrslitaleikir voru í mótinu og ekkert lið stóð því uppi sem sigurvegari í lokin. Þetta er meira hugsað sem jólasprikl fyrir iðkendur í jólaleyfinu miðju. Hvert Víkingslið spilaði þrisvar sinnum og þannig voru alls tólf leikir í mótinu þar sem Víkingar öttu kappi við andstæðinga sína.

Kári markvörður Sveinsson var tvímælalaust Víkingur dagsins í Egilshöll. Forföll annarra markvarða í flokknum urðu til þess að hann varði mark Víkinga í níu leikjum af tólf í mótinu! Ekki nóg með það því drengur var í hvínandi stuði. Hann varði hvað eftir annað eins og berserkur og lokaði markinu fyrir ágengum sóknarmönnum úr röðum andstæðinga. Úrslitin urðu annars eftirfarandi:

A-liðið (hópur 1):

• Fjölnir-Víkingur 0-1
• Víkingur-Fylkir 2-0
• KR-Víkingur 0-0

B-liðið (hópur 2):

• Fjölnir-Víkingur 1-1
• Víkingur-Fylkir 0-1
• KR-Víkingur 0-5

C-liðið (hópur 3):

• Fjölnir-Víkingur 0-0
• Víkingur-Fylkir 5-0
• KR-Víkingur 0-2

D-liðið (hópur 4):

• Fjölnir-Víkingur 0-1
• Víkingur-Fylkir 1-2
• KR-Víkingur 3-0