Veisla a la Þór á Akureyri

Tvær fótboltamömmur úr þriðja flokki Þórs, Hrafnhildur Óladóttir og Regína Sigvaldadóttir, buðu heimaliðum og Víkingshópnum til óvæntrar en einstaklega ljúfrar veislu að leikslokum á sunnudag. Þær buðu upp á brauð með salati, skúffukökur og ávexti eins og hver gat í sig látið og drykki með!

Vita skulu þær stöllur að veitingar Þórsara söddu hungur sunnanmanna og léttu lund þeirra verulega í bráð og lengd. Það var næstum því svo að Víkingar kenndu sér samviskubits yfir því að renna úr hlaði á Akureyri með öll stig kvöldins í farteskinu  eftir að hafa fengið kviðfylli af bakkelsi í bónus frá Þór. 

Komið hefur á daginn að slíkur viðurgjörningur er hefð hjá Þórsurum, sem er ótrúlega flott og fínt. Mættu aðrir klúbbar tileinka sér að vera slíkir höfðingjar heim að sækja, meðal annars ónefnt knattspyrnufélag í Fossvogi....

Við Vikingar þökkum fyrir okkur. Gestrisni Þórs er geymd en ekki gleymd.