Æfingagjöld og fleira skemmtilegt

Barna- og unglingaráð hvetur foreldra til að greiða æfingagjöldin eða semja um greiðslur. Veittur er afsláttur ef greitt er fyrir 1. mars 2009 og munar um allt slíkt á hinum síðustu og verstu tímum.

Þorrablót knattspyrnudeildar Víkings er næstkomandi föstudag, 13. febrúar. Þeir sem vilja blóta í góðum félagsskap ættu að kíkja inn á heimasíðu Víkings og skrá sig hið fyrsta.

ÍR-ingar lagðir í tvígang á heimavelli

Víkingar sigruðu ÍR-inga í báðum æfingaleikjunum sem stofnað var til á gervigrasvelli ÍR í dag.  Leik A-liðanna lyktaði með einu marki heimamann gegn fjórum mörkum gestanna og B-leiknum lyktaði með tveimur mörkum gegn þremur.

Víkingar voru lengi að komast í gang í A-leiknum og í leikhléi var staðan 1-0 fyrir ÍR. Eftir hlé fékk dæmdi þjálfari ÍR, dómari leiksins, vítaspyrnu á lærisveina sína. Óli Pétur þakkaði fyrir með því að skora og jafna. Þar með komust Víkingar á beinu brautina og röðuðu inn mörkum. Einar Sig. kom sínum mönnum yfir, svo kom klassísk langskotsbomba frá Viktori Jóns yngri sem söng í netinu og Óli Ægir skoraði svo fjórða markið beint út aukaspyrnu.

Víkingar reyndu að létta ÍR lífið í B-leiknum með sjálfsmarki en lengra gengu þeir ekki í góðmennsku sinni. Fjölnir skoraði fyrsta markið, Haukur Jóns annað og Agnar Darri það . ÍR-ingar skoruðu einu sinni og leikurinn fór sem sagt 2-3 fyrir Víking.

Aðstæður voriu frekar erfiðar á ÍR-vell, bálhvasst en þurrt að mestu.

Leikir á ÍR-velli

Víkingar og ÍR-ingar eigast við á gervigrasi ÍR á morgun, laugardaginn 24. janúar. A-liðin byrja að spila kl. 13:00 og leikur B-liðanna hefst strax að þeim leik loknum. Nú er að taka á því, Víkingar!

 

Fjáröflunarátak sveifað í gang

Fjáröflunarátak 3. flokks er hafið og látið nú hendur standa fram úr ermum að afla viðskipta til ágóða fyrir ykkur og flokkssjóðinn! Við þurfum að eiga eitthvað í sjóði, meðal annars til að standa straum af keppnisferðum eða öðru sem kallar á útgjöld á árinu. Seljendur varningsins fá ágóðann á eigin reikning í vörslu gjaldkera flokksráðs.

Strákarnir fá innkaupalista og þar er að finna salernispappír, eldhúsrúllur, þvottaefni og ruslapoka í rúllum.

Birna Hugrún annast sölu- og markaðsmál átaksins. Innkaupalistann getið þið hlaðið niður af Víkingssíðunni og prentað út.

Listanum eigið þið skila að skila til Birnu í tölvupósti í síðasta lagi föstudaginn 30. janúar.

Vörurnar verða afhentar í Víkinni þriðjudaginn 3. febrúar kl. 17:00-19:00.

 

Birna Hugrún - tölvupóstfang : [e-mail]

Æfingin í dag

Æfingin í Egilshöll í dag, laugardaginn 17. janúar, er frá klukkan 14:30 til 16:30!

Sigurvegarar í dósasöfnuninni!

Þriðji flokkur í knattspyrnu drengja var með yfirburðamætingu í dósasöfnun Víkings um síðustu helgi og vann til verðlauna! Barna- og unglingaráð félagsins hétu því að veita þeim viðurkenningu sem skiluðu sér best til starfa við að flokka og telja dósir og flöskur í Víkinni í söfnunni, sem reyndist skila metárangri (39.000 dósir og flöskur komu í hús!). Níu af hverjum tíu strákum í 3. flokki mættu til leiks, sem var afgerandi besta mætingin í öllum yngri flokkum handbolta og fótbolta. Hjá stelpunum var besta mætingin í 6. flokki fótboltans, 75%.

Flogið hefur fyrir að sigurvegurunum í dósasöfnuninni verði haldin pizzuveisla í Víkinni þegar Inter og Manchester United keppa í Meistaradeild Evrópu seint í febrúar. Þar mætast stálin stinn, knattspyrnustjórarnir og vinirnir sir Alex og Jose Mourinho með lærisveina sína. Mourinho skrapp til Manchester á dögunum til að heilsa upp á sir Alex og fylgjast með United niðurlækja Chelsea á Old Trafford. Svo er spurningin hvor þeirra félaga brosir breitt að lokinni síðari viðureign Inter og United í 16 liða úrslitum Meistaradeildarinnar í mars....?