Leiknisleiknum frestað!

 Leiknum við leikni, sem var á dagskrá í kvöld,  mánudag, hefur verið frestað um eina viku. Hann verður um sé á mánudaginn kemur, 15. desember. Strákarnir mæta í kvöld á reglubundna æfingu á HK-velli kl. 19:30.

 

Foreldrafundinum frestað um viku

Boðuðum fundi foreldra í 3. flokki er frestað um eina viku. Hann átti að vera þriðjudaginn 9. desember en verður þriðjudaginn 16. desember kl. 18:00 í Víkinni.

Ástæða frestunar er sú að Sjúkraliðafélag Íslands er kallað að kjarasamningaborði með sveitarfélögunum á morgun, þriðjudag, sem ekki var fyrirsjáanlegt þegar foreldrafundurinn var ákveðinn upphaflega. Gunnar Örn Gunnarsson, nýr þjálfari vor, er framkvæmdastjóri Sjúkraliðafélagsins og hverfandi líkur voru á að hann kæmist frá kjarasamningaþrefi til foreldrafundarins. Það þótti bæði honum og fundarboðendum  slæm  staða og því var ákveðið að fresta fundinum í eina viku.

• Myndir af æfingu í Víkinni 7. desember 2008

Sætt og súrt gegn KR

Víkingar unnu KR í lokaleik A-liða í haustmóti KSÍ í Egilshöll í dag en þurftu hins vegar að játa sig sigraða í viðureign við KR í B-leiknum.

Víkingar réðu ferðinni í fyrri hálfleik A-liðana og skoruðu í tvígang. Patrik smurði boltanum í stöng og inn og átti fyrirgjöf á Óla Pétur sem kláraði færið með marki. Tvö núll í hálfleik og Víkingar í góðum málum en KR-ingar mættu til leiks eftir hlé ákveðnir í að klóra í bakkann. Þeir skoruðu fljótlega og jöfnuðu skömmu síðar. KR-ingar voru líklegri til að komast yfir og útlit var fyrir jafntefli sem Víkingar hefðu reyndar mátt þakka fyrir miðað við gang mála í síðari hálfleik. Þá klúðraði vörn KR því að hreinsa frá markinu, boltinn barst til Óla Péturs rétt utan við vítateigslínu og hann vippaði laglega yfir markvörðinn. KR klúðraði síðan dauðafæri í blálokin og Víkingar hrósuðu sigri.

Víkingur átti eina markið í fyrri hálfleik B-liðanna. Viktor skoraði með þrumuskoti utan vítateigs og markvörður KR átti enga möguleika. KR-ingar áttu líka hættulegar sóknir og Halldór þurfti í tvígang að taka á honum stóra sínum. Í annað skiptið varði hann hörkuskot af stuttu færi og Víkingar flutu því inn í leikhléið með stöðuna eitt núll. Í síðari hálfleik hresstust KR-ingar verulega og jöfnuðu. Þjálfarar Víkings hresstu upp á sóknarleikinn með innáskiptingum sem skiluðu greinilegum árangri. Víkingar sóttu án afláts en tókst samt ekki að skora. KR-ingar uppskáru hins vegar mark, gegn gangi leiksins, og fóru með sigur af hólmi.

KR-ingarnir viðhöfðu munnsöfnuð í leikjunum báðum sem var dómurunum ekki að skapi. Þeir fengu á sig þrjú gul spjöld fyrir kjafthátt í B-leiknum og eitt í A-leiknum. Í þeim efnum voru þeir því ótvíræðir sigurvegarar dagsins.

A- og B-lið Víkings höfðu sigur í tveimur leikjum í haustmótinu en töpuðu í einum. A-liðið tapaði fyrir Fylki en vann Þrótt og KR. B-liðið vann Fylki og Þrótt en tapaði fyrir KR.

B2-lið Víkings og ÍR áttust við í haustmótinu í dag að loknum A- og B-leikjunum fyrrnefndu. Skemmst er frá að segja að ÍR-ingar unnu 4-2 eftir að hafa haft 2-0 forystu í hleikhléi. Kolbeinn og Fjölnir skoruðu Víkingsmörkin í síðari hálfleik. Munurinn á liðunum var samt ekki sá sem markatölurnar gefa til kynna. Myndirnar hér að neðan voru teknar af spekingslegum Víkingum á bekknum þegar leikurinn við ÍR stóð yfir.

B2-lið Víkings fékk enn verri skell í Frostaskjóli á fimmtudaginn var þegar það tapaði fyrir KR 7-2 í haustmótsleik.

HK-völlur inn, Fylkisvöllur út

Staðfestar eru breytingar á æfingatöflu 3. flokks á þann veg að HK-völlur kemur sterkur inn en ferðir upp á Fylkisvöll í Árbæ falla niður í staðinn. Þetta hljóta að teljast góð tíðindi. Þá verða æfingar á miðvikudögum í stað þriðjudaga en sunnudags- og fimmtudagsæfingar verða með óbreyttu sniði. Æfingar verða því sem hér segir:

• Sunnudagar kl. 18:15 - 20:00: Víkin inni (fótbolti, lyftingar, snerpa).
• Mánudagar kl. 19:30 - 21:00: HK-völlur
• Miðvikudagar kl. 18:00 - 20:00: Víkin úti og inni (hlaup, lyftingar, tækni) .
• Fimmtudagar kl. 20:30 - 22:00: Framvöllur.

Úr Víkinni berast þær fréttir að vinnuvélar verktaka rótist í möl og jarðvegi til undirbúnings því að leggja sjálft gervigrasið á nýja völlinn. Pípulagningarmenn vinna jafnframt að því að tengja lagnir vallarins til að unnt sé að hita völlinn upp áður en kemur að því að leggja grasið. Veðurfarið er hagstætt framkvæmdinni þessa dagana og nú gera menn sér vonir um að það takist að malbika rönd meðfram vellinum í næstu viku og gera síðan atlögu að lokaáfanga verksins.

 

Löðursveittir í lyftingum á fyrstu æfingu nýs þjálfara

Strákarnir voru látnir taka á því svo um munaði á fyrstu æfingu Gunnars Arnar Gunnarssonar í Víkinni í kvöld. Nýi þjálfarinn byrjaði með fundi í hátíðarsalnum þar sem hann kynnti sig og spjallaði góða stund við verðandi lærisveina sína, 45 talsins. Síðan skiptu þeir Sindri aðstoðarþjáfari liðinu í þrjá hópa og létu tvo þeirra vera í bolta- og snerpuæfingum í íþróttasalnum en þriðji hópurinn puðaði á meðan í tækjasalnum. Langflestir strákanna höfðu aldrei áður reynt á vöðvana í tækjum og þetta var því tímamótaæfing í þeim skilningi og spennandi sem slík. Enda heyrðist ekki eitt einasta andvarp yfir því að æfingin var í lengra lagi, hátt í tvær klukkustundir og hálftímafundur á undan að auki!

Engum blöðum er um það að fletta að vetrarstarfið og komandi tímabil leggst vel í mannskapinn, það skein af hverjum manni langar leiðir í kvöld. Menn brostu breitt þó svo sumir kenndu sér verkja í kroppnum og væru bæði bullsveittir og rauðir sem karfar í framan eftir átökin.

Æfingar í nóvember verða sem hér segir:

• Sunnudagar: Víkin innanhúss kl. 18:15 - fótbolti, lyftingar og snerpa.
• Mánudagar: Víkin innan- og utanhúss  kl. 18:00 - hlaup, lyftingar og tækni.
• Þriðjudagar: Fylkisvöllur kl. 20:00 - fótbolti.
• Fimmtudagar: Framvöllur kl. 20:30 - fótbolti.

Síðustu leikir haustmótsins eru núna á fimmtudaginn og á laugardaginn. Sjá KSÍ-síðuna.

• Fleiri myndir frá fundinum og æfingunni í Víkinni.

Inniæfing og nýr þjálfari á sunnudaginn!

Þriðja flokks menn eru hér með boðaðir til æfingar á sunnudaginn kemur, 2. nóvember, kl. 17:45 í Víkinni!

Halló, halló!

Athugið að hvorki stund né staður æfingar að þessu sinni telst kvunndagskostur enda ástæða til: Gunnar Örn, nýr þjálfari flokksins, kemur til starfa og messar yfir lærisveinum sínum svo um munar....

Næsta verkefni eru leikir við KR í Frostaskjóli á fimmtudaginn kemur, 6. október (B2-lið), og við KR og ÍR í Egilshöll laugardaginn 8. nóvember (öll liðin þrjú).

• Sjá mótasíðu KSÍ