Æfingar og leikir næstu daga

Þjálfari vor hefur sett um dagskrá yfir æfingar og leiki á næstunni. Menn þurfa að feta sig eftir henni frá degi til dags og hafa í huga að það var í gær verður ekki endilega í dag.....

• Þriðjudagur 1. júlí: Æfing í Víkinni 16:30.
• Miðvikudagur 2. júlí: Æfingar falla niður vegna Vestfjarðaferðar A-liðsins.
• Fimmtudagur 3. júlí Æfing í Víkinni 16:30 (Viggó Briem verður þá farinn á N1-mótið á Akureyri en maður kemur í manns stað til að stjórna æfingunni).
• Föstudagur 4. júlí til sunnudags 6. júlí: Engar æfingar, engir leikir.
• Mánudagur 5. júlí:
  • Leikur A-liðsins við Þrótt í Laugardal kl. 16:00, mæting kl. 15:00.  Þar mæta allir Vestfjarðafarar til leiks + Ólafur Ægir.
  • Aðrir í flokknum mæti til æfingar í Víkinni 16:30.
• Þriðjudagur 6. júlí: Æfing í Víkinni 16:30.

 

 

 

Leikurinn á Ísafirði

Vesturfarar eiga að mæta á Reykjavíkurflugvöll kl. 7:15 í fyrramálið, miðvikudag 2. júlí, brottför til Ísafjarðar er kl. 7:45 og lending í Reykjavík við heimkomu er kl. 19:00 annað kvöld.

Athugið:

• Strákarnir eiga að hafa persónuskilríki í fórum sínum til innritunar í flugið: bankakort eða vegabréf.
• Strákarnir eða forráðamenn þeirra þurfa að hafa meðferðist 9.000 krónur í reiðufé til að snara út fyrir sínum hlut í fargjaldi og hádegismat fyrir vestan. Þeir hafi líka með sér nesti til að kroppa í yfir daginn.

Viggó þjálfari sendir nánari útlistun í tölvupósti.

Leikur Víkings og liðs Bolvíkinga/Ísfirðinga hefst kl. 15:00 og við stefnum að því að birta úrslit hér á síðunni um leið og þau liggja fyrir. Vestfirðingarnir hafa leikið fjórum sinnum í Íslandsmótinu, tapað þrisvar (fyrir Grindvíkingum, Mosfellingum úr Aftureldingu og Selfyssingum) og gert jafntefli við Leikni.

20 marka súpa og slökkvilið kallað út

Óli Pétur er kominn á söguspjöld Knattspyrnusambands Íslands, fyrstur Íslendinga til að ræsa út heilt slökkvilið með fótboltasparki einu saman. Í A-leik Víkings og Eyjamanna í Egilshöll í dag þrumaði drengurinn beint í brunaboða uppi á vegg handan vallarenda og græjan boðinn skildi áreitið á þann veg að eldur væri laus í húsinu. Það þurfti handaflsaðgerðir til að stöðva atganginn í sjálfvirka eldvarnakerfinu og halda slökkviliðinu og almannavörnum í skefjum í hreiðrum sínum við Skógarhlíð. Vissulega var boðanum samt nokkur vorkunn því  Víkingar fóru sem logi um akur gegn ÍBV og sigruðu samanlagt 20-2 í dag. Slökkvilið hefur því verið kallað út af minna tilefni.

A-liðið vann 9-0. Davíð skoraði þrennu, Patrik tvö og Haukur Jóns, Robbi, Jón Reyr og Óli Pétur eitt hver. Reynar ætti brunaútkallið hans Óla að vera í það minnsta jafngildi sex stiga í bókhaldi KSÍ en það er önnur saga.

Sama einstefnan hélt áfram í leik B-liðanna þar sem Víkingar sigruðu 11-2. Viktor var þar með fernu, Röggi skoraði tvisvar og hélt þannig upp á afmælið sitt (til hamingju!), Ólafur Andri setti tvö og  Agnar Darri, Sigurður Davíð og Jökul Starri eitt hver.  

Eitt Víkingslið 4. flokks heldur til Ísafjarðar á miðvikudagsmorguninn í næstu viku, 2. júlí, til að spila við sameiginlegt lið Ísfirðinga og Bolvíkinga. Leiknum hefur verið flýtt til kl. 15:00 til að strákarnir nái örugglega flugi suður með kvöldvélinni. Viggó tilkynnir liðsskipun en ætla má að A-liðið verði kjarni hópsins.

Blúss hjá B, jafnt hjá A

B-liðið okkar fór á kostum gegn Breiðabliki á Versalavelli í gær og sigraði 0-6. Röggi fyrirliði fór fyrir sínum mönnum og skoraði í tvígang, Agnar Darri skoraði líka tvisvar og svo áttu Haukur Jóns og Sigurður Davíð eitt mark hvor. Blikarnir voru sem deig í klóm Víkinga og sáu aldrei til sólarinnar sem samt skein firnaskært á himnafestingunni ofan Kópavogs.

A-liðið uppskar eitt stig úr viðureign sinni við Breiðablik og hafði talsvert fyrir því. Blikarnir skoruðu snemma í leiknum úr eina alvörufærinu sem þeir fengu frá upphafi til enda. Víkingarnir réðu hins vegar lögum og lofum á vellinum stóran hluta leiks en tuðran vildi bara ekki í net græntreyjanna fyrr en Agnar Darri náði fínum spretti í blálokin og jafnaði. Drengurinn sá var sem sagt í stuði í báðum leikjum gærdagsins og setti mark sitt á þá í tvöföldum skilningi. Þetta var sum sé svona leikur og heyrir nú sögunni til. Það hefði svo sem verið afar vel þegið að heimaríkur (Breiðabliks)dómari leiksins hefði látið Víkingi eftir vítaspyrnuna sem liðið átti hiklaust að fá en fyrst svo fór sem fór var eitt stig mun betra en ekki neitt.

Skammt er stórra högga á milli. Næstu leikir í Íslandsmótinu eru strax á morgun, fimmtudag. Þá mæta Víkingar Eyjamönnum í Egilshöll. Leikur A-liða hefst kl. 17:00 og B-liða kl. 18:30.

Í næstu viku fer svo eitt Víkingslið til Ísafjarðar til að keppa við sameiginlegt lið Ísfirðinga og Bolvíkinga á Torfunesvelli miðvikudagnn 2. júlí. Nánar um það síðar.

Villi útnefndur leikmaður ferðarinnar

Hann Villi okkar Ingólfsson var útnefndur leikmaður ferðarinnar í lokahófinu í gærkvöld og á það svo sannarlega skilið. Viggó þjálfari sagði að Villi hefði verið háttvís og prúður piltur utan vallar sem innan og sýnt áberandi framfarir í fótboltanum. Þetta kom allt heim og saman. Villi er drengur góður og átti til dæmis skínandi leik gegn Spánverjum í Cartagena á þriðjujdaginn.

Haukur og Davíð Örn fengu viðurkenningu fyrir háttvísi. Og hugsið ykkur, dömur mínar og herrar: Villi og Davíð eru báðir uppaldir hjá KA hjá Akureyri og eru þessu góða móðurfélagi sínu til mikils sóma! Það er Víkingum heiður að fóstra piltana áfram og taka upp þráðinn frá KA. Villi, Haukur og Davíð eru vel að viðurkenningu sinni komnir.

Það var sum sé mikil lokaveisla strax eftir Evrópukeppni á æfingasvæðinu þar sem foreldrar og iðkendur skiptu sér í sex lið sem nefnd voru eftir nokkrum þátttökuþjóðum í EM. Auðvitað unnu Hollendingar sem margir í hópnum hér sjá helst fyrir sér Evrópumeistara í ár.

Halldór fékk viðurkenningu fyrir framfarir og ástundun - keppnistreyju merkta hinum spánska Juanmi sem þjálfaði markmennina okkar í vikunni. Verðlaun og viðurkenningar voru veittar fyrir knattþrautir, spurningaleiki, eggjaboðhlajup og vér vitum ekki hvað.

Stærstu verðlaunin eiga samt skilið þau sem gerðu dvölina hér það sem hún er og hafa lagt á sig ómælda vinnu mánuðum saman: Kjartan og Katrín, Ingibjörg, Bjartmar. Einnig Viggó yfirþjálfari, Bjössi Bjartmars, hinn góðkunni þjálfari, Þrándur, Kristinn Bjartmarsson og Soffía frænka, sú óstöðvandi matmóðir og umvefjandi fararstjóri sem var vakin og sofin yfir velferð drengjanna. Hallelúja. Guðmundur og Bogey lögðu líka heldur betur sitt af mörkum.

Villi og og Viggó þjálfari á lokahófinu.

• Fleiri myndir frá lokaskrallinu okkar í albúminu til hægri á síðunni!

Strandhögg Víkinga á La Manga

Spánverjar sáu ekki til sólar í leik B-liðsins við jafnaldra frá grannhreppnum Los Belones í dag en leikur A-liðsins við stráka héðan frá La Manga var jafnari. B-liðið sigraði með sex mörkum gegn engu. Spánverjarnir skoruðu sjálfsmark, Viktor setti tvö, Haukur eitt, Agnar Darri eitt og Fjölnir eitt. Staðan í hálfleik var 4-0. 

A-leikurinn fór 3-1 fyrir Víking og okkar menn sáu alveg um markaskorun dagsins. Aron Elís, Óli Pétur og Robbi skoruðu í fyrri hálfleik og yfirburðirnir voru mun meiri en sú staða gefur til kynna. Eftir hlé fóru La Manga-menn að skipta inn á strákum sem voru með skeggrót, hármottur á bringunni og bassaraddir eins og í eðalkirkjukór. Þeir voru með öðrum orðum augljóslega talsvert eldri en okkar menn en það gerði bara ekkert til. Leikurinn varð fyrir vikið jafnari og skemmtilegri. Nærri lá að fullorðnu Spánverjunum tækist að skora en eina mark hálfleiksins kom samt þegar boltinn skrapp af okkar mönnum úr þvögu og flaut yfir marklínuna.

Nú fer að síga á seinni hluta frábærrar dvalar í La Manga-hreppi. Á morgun verður létt og ljúft hjá mannskapnum: þrautamót fyrir hádegið, fótbolti með foreldrum síðdegis og síðan sameiginleg veisla strákanna og foreldranna annað kvöld.

 Örn og Þorgrímur kampakátir með sína menn að leikslokum.

Fleiri myndir frá leikjum dagsins í myndaalbúminu!