Þjálfari gerir upp ferð á Norway Cup

„Ferðin hefur verið yndisleg og hún fer í reynslubankann hjá strákunum.  Ég staldra hins vegar fyrst og fremst við hve þægilegan og flottan hóp við erum með á Norway Cup. Ég get sagt það hreint út að ég hef ekki fyrr kynnst því í hliðstæðum ferðum að menn leggi sér lífsreglurnar sjálfir og virði þær, fari til dæmis í háttinn snemma kvölds til að vera klárir í leiki að morgni. Slíkt hugarfar er lykill að árangri í íþróttum og öðru sem menn þurfa að takast á við,“ segir Gunnar Örn Gunnarsson þjálfari um ferðalag Víkinga á Norway Cup.

„Við komum öðru liðinu í 32ja liða úrslit og hinu í 8 liða úrslit í keppni  hátt í 200 liða. Við vorum mjög svekktir yfir að tapa naumlega í síðustu leikjum beggja liða en það er hluti af tilverunni í fótbolta að taka bæði sigri og ósigri.  Við fáum ekkert gefins á vellinum, hvorki í svona keppni né í neinni annari keppni og eigum ekki að gera ráð fyrir því. Fyrir stærstu sigrunum þarf mikið að hafa og þeir lifa líka í minningunni.

Þegar upp er staðið vekur athygli mína að Víkingarnir eru betri fótboltamenn en 90% af þeim Norðmönnum sem við kepptum við á mótinu og báðir markverðirnir okkar voru til dæmis betri en markverðir allra norskra liða sem við spiluðum við. Norsku liðin virðast upp til hópa vera minna þjálfuð en þau íslensku.

Víkingur 1 tapaði ekki leik á mótinu. Við komumst áfram í gríðarlega spennandi vítaspyrnukeppni gegn Portúgölum en töpuðum hins vegar fyrir Gróttu í vítaspyrnukeppni eftir að hafa byrjað þann leik með röngu hugarfari en tekið hann síðan yfir með góðri baráttu og fínum fótbolta. Það er stutt á milli lífs og dauða þegar útkljá þarf leiki á þennan hátt en svona er það bara.

Ég var ánægður með margt í leik Víkings 1 á mótinu, sérlega gaman var til dæmis að kljást við Portúgalina í háspennuleik í orðsins fyllstu merkingu – með háspennulínur yfir vellinum sem settu sitt mark á sjálfan leikinn! Helst hefði ég kosið að fá að spila við fleiri lið héðan og þaðan úr veröldinni, með fullri virðingu fyrir norsku liðunum. Til dæmis hefði ég verið meira en til í að spila við brasilíska liðið sem sendi Gróttu út úr keppninni í fjögurra liða úrslitunum,  því þetta hefði hugsanlega verið eina tækifæri strákanna á ævinni til að spila við slíkt lið og vinna það - miðað við það sem ég sá til Brasilíumannanna gegn Gróttu.

Víkingur 2 var í nákvæmlega sömu keppni hér og Víkingur 1 og fékk erfiðari andstæðinga í tveimur leikjum í riðlinum en Víkingur 1. Ég var ánægður með frammistöðu liðsins og ætla að nefna sérstaklega að vörnin og markmaðurinn stóðu þar upp úr allan tímann.

Þegar öllu er á botninn hvolft fengu strákarnir dýrmæta keppnisreynslu í fótbolta, upplifðu hversu mikilvægt það er að koma með hugarfar sigurvegarans til leiks og fengu einnig tækifæri til að bera sig saman við erlenda jafnaldra sína.

Mótið sjálft var skemmtilegt og ekki síst mun ég minnast Norway Cup fyrir metnaðarfulla íþróttamenn sem Víkingur á. Þeir geta náð í fremstu röð ef hugurinn stendur til þess.  Að endingu vil ég láta koma fram að það er heiður að vinna með slíkum hópi sem hefur mikinn metnað og gerir sér fyllilega grein fyrir að árangur er stórir bróðir mikillar vinnu. “

• Myndasasarpur Norway Cup - ýmislegt
• Úrslitaleikir - myndir
• Riðlakeppni - myndir